Norec-partner Techbridge styrker unge entreprenørar
Sidan 2017 har Techbridge Invest lært opp over 600 unge entreprenørar i Kenya og fremja berekraftig forretningsutvikling. Med støtte frå Norec, bidreg dei til å minske ulikskapar og fremje økonomisk vekst i Aust-Afrika.
– I Techbridge møter vi folk med ei praktisk tilnærming, slik at dei lærer medan dei jobbar. Det har gitt oss moglegheit til å bygge vellukka oppstartsselskap og hjelpe unge entreprenørar å lukkast, forklarar Milton Onyiro, som er finanskontrollør i Techbridge Kenya.
Techbridge Invest tilbyr opplæring, rettleiing og praktisk støtte til unge entreprenørar i Kenya for å skape lønnsame og berekraftige selskap. Mellom 2021 og 2024 var selskapet del av ei Norec-utveksling mellom Techbridge Invest i Noreg, Techbridge Invest Africa i Kenya og SUNami Solar i Kenya og Uganda. Prosjektet er eit godt døme på korleis næringslivet kan bidra til utvikling og berekraftsmåla.
Nysgjerrig på ordninga? Klikk her for å lære meir om tilskotet og korleis det kan hjelpe bedrifta di
Store moglegheiter i den afrikanske marknaden
Techbridge Invest har utvikla intensive opplærings- og inkubasjonsprogram som varer i sju til ni månadar.
– Desse programma har vore avgjerande for å etablere selskap innan solenergi, tryggingsløysingar og landbruk, seier tidlegare finansdirektør i Techbridge og tidlegare Norec-deltakar, Nermina Ljevakovic.
Ljevakovic var første deltakar på utveksling i det Norec-støtta prosjektet. Ho var med og bygde opp Techbridge Invest Africa frå kontoret i Mombasa i Kenya.
Techbridge Invest i Noreg, Techbridge Invest Africa og SUNami Solar jobbar med å bruke teknologi og innovasjon for å nå berekraftsmåla og skape ei betre framtid.
Styrker kvinner og unge menneske
Techbridge Invest vil hjelpe fleire kvinner inn i teknologibransjen. Ved å gi kvinner moglegheiter til å lære seg teknologi, og sikre seg jobbar innan feltet, bidreg dei til å løfte kvinner inn i næringslivet. For Techbridge har samarbeid med internasjonale partnarar vore ein nøkkelfaktor, noko dei har kunne gjort ved hjelp av støtta frå Norec.
– Utveksling av tilsette mellom Noreg, Kenya og Uganda har vore viktig for å sikre kunnskapsdeling og oppbygging av Techbridge Invest Africa i Kenya, seier Ljevakovic.
På åtte år har Techbridge Invest skapt over 500 arbeidsplassar i Aust-Afrika.
Brukar teknologi for å nå berekraftsmåla
Techbridge Invest hjelper gründerar frå idéfase til nyoppstarta bedrifter. I tillegg har Techbridge eit fond som investerer i desse selskapa, og hjelper dei til å bli sjølvstendige.
Selskapa som får støtte frå Techbridge Invest utviklar teknologiske og innovative løysingar på utfordringar i den afrikanske marknaden.
Eit døme på dette er SUNami Solar Kenya, som jobbar med å elektrifisere landsbygda i Kenya og Uganda. Selskapet vart etablert som eit resultat av opplæring i entreprenørskap, og var del av eit Norec-støtta partnarskap.
– Tilgang til straum er det viktigaste for forbrukarane i Kenya, uavhengig av kjelda. SUNami tilbyr rimelege solcellepanel som gir folk moglegheit til å starte små bedrifter, til dømes frisørar eller kinoar, noko som skapar jobbar og aukar velstanden, seier Ljevakovic.
Ho peikar på at dersom vi skal nå berekraftsmåla og få slutt på fattigdom, er det viktig at veksten i Afrika er grøn.
Den grunnleggjande tanken til Techbridge Invest er å tene pengar, samtidig som dei bidreg til berekraftig utvikling i Afrika.
– Innsatsen til Techbridge Invest er ein vinn-vinn situasjon for bedrifter, entreprenørar og verda. Vi byggjer og investerer i selskap med klimasmart teknologi som løyser utfordringar, seier Ljevakovic.
Verdiane til Norec er viktige
Innsatsen Techbridge Invest legg ned for å styrke unge entreprenørar i Aust-Afrika syner korleis strategiske investeringar og internasjonalt samarbeid kan skape monaleg sosial og økonomisk påverknad.
– Verdiane til Norec er viktige. Dei samlar oss som eit globalt samfunn, får oss til å jobbe saman og sjå framover. Det er kjernen av utvikling, seier Onyiro frå Techbridge Invest Africa.
For bedrifter kan eit Norec-samarbeid med forretningspartnarar i sør bidra til tettare samarbeid og redusert risiko. Har du eit samarbeid innan næringslivet som kan bidra til utvikling, og samstundes bidra til at vi kan nå berekraftsmåla?
Nysgjerrig på ordninga? Klikk her for å lære meir om tilskotet og korleis det kan hjelpe bedrifta di
-
Nye prosjekt i 2024
- SUNami Solar Kenya har starta eit nytt samarbeid støtta av Norec. Prosjektet er mellom Sunami Solar Uganda, Multiconsult frå Noreg og Synergy frå Kamerun. Dei jobbar med å fremje tilgang til rein energi. Målet er å auke teknisk og administrativ kunnskap om solenergi, slik at fleire afrikanske samfunn kan få tilgang til reine energiløysingar.
- Techbridge Invest har også inngått eit prosjekt med Universitetet i Agder for å fremje berekraftig utvikling og entreprenørskap i Aust-Afrika. Samarbeidet er både akademisk og praktisk, og lar studentar og forskarar frå Universitetet i Agder jobbe tett med Techbridge sine prosjekt i Kenya og Uganda. Målet er å kombinere akademisk innsikt med praktiske forretningsløysingar for å takle sosioøkonomiske utfordringar i regionen.
- Norec støttar prosjekt der næringslivet kan bidra til utvikling og berekraftsmåla.
Norec-partner Techbridge Invest i Øst-Afrika og deres samarbeidspartnere
